الهبرانية
ايـام حـلـوه هنـيـه
بالضبـط والهبرانـيـه
بيـن الخـوي وخويـه
مزح وضحك وخذ وهات
هبرانـيـه مزرعتـنـا
عشنا فيها من طلعتنـا
غذتنـا وايضـا ربتنـا
من جدانـي والجـدات
الهبرانـيـه حايطـنـا
بقعٍ بالماضـي يربطنـا
ولا احدٍ فيـه يغالطنـا
والضبط شيخ الحـارات
حنا واعيـال الجيـر
انندخل نطلع تقل اخـوان
من نصبح لين امسيـا
نربع بروحـات وجيـات
بعضنا يسبـح بالبركـه
وبعضنا تلقى له حركـه
بالاثله نـاس مشتركـه
قنـاصـة بالنبـاطـات
ويـومٍ تلقانـا كشّاتـه
كلٍ يجيـب اغريضاتـه
واللي عندك ياخي هاته
ونشري بريال اخبيزات
انروح لنفـود مصبّـحما
غير انراكض ونلبّـح
والى شفنا كلـبٍ ينبـح
نبـدا معـه امطـاردات
وش تلقانا عند الشاهي
انسويه وفيـه انباهـي
مرٍ زيـن ومـرٍ ماهـي
والنار شـوي عويـدات
نزعل لاجينـا بالنكسـه
تلقى حالتنـا منتكسـه
نضحك والهرجه منعكسه
على اللي بالكشته فـات
والـى منـا تفرقـنـا
والى تقل احـدٍ يلحقنـا
من كثـر مـا تسابقنـا
رجلينـا كلـه لكمـات
واذكـر قعدتنـا بالقبـه
ومن الجصة تمر نلبـه
واختي بالصفة منكبـه
تصيح اشروا لي عبـاة
وش تلقانا عقب المغرب
احدٍ يقرا واحـدٍ يكتـب
والنور اسراج ويقبقـب
مجتمعيـنٍ بالمنـحـات
نرقـا فرحيـن للطايـه
ونلعب جميـع الدبايـه
سباحينٍ فـوق الغايـه
حدر القمرا والنجمـات
ماحـدٍ بالدنيـا ملـزوم
لما انـه يجينـا النـوم
من غير اهموم وحلـوم
هذي بعـض الذكريـات
يا زين الماضي وعلومه
غاياته كلـه مفهومـه
ما فيه اسرارٍ مكتومـه
بين الاخـوه والخـوات