عن اللي بقلبي ما يعبر لي لساني |
|
لعلي أبين ما عجز عنه منطوقي |
|
اجاوب حمام الورق في زين الألحاني |
|
لعلي ليا جاوبتها ينطلق عوقي |
|
اقلب منامي بين ها الجنب والثاني |
|
واهوجس لمين الصبح ينباح بشروقي |
|
ابا سف على وقت مضى لي من أزماني |
|
ثلاثين عام شاهدة ما به افتوقي |
|
على رفقة ما بين ربع وصدقاني |
|
تولت وولت مثل شعف على الطوقي |
|
مثل سدرة فيها تنيّا كحيلاني |
|
وهلت ورقها يوم فلت به النوقي |
|
اعزي ضميري واتفكر بما جاني |
|
وانا اللي بوسط الناس ما يرخص سوقي |
|
احسب الليالي يوم تضحك علشاني |
|
اثر نقصها بين على كل شاهوقي |
|
مع الناس حاضر لكن الطيب خلاني |
|
اصم الأذاني واسمع الرمي من فوقي |
|
انا ما دريت ان الليالي تحداني |
|
اقوله وانا اللي ماشي كل طاروقي |
|
احسب الوفاء رمز الموده وعنواني |
|
واحسب الغلاء ما بين الأثنين مأثوقي |
|
احسب الصداقة غرسة وسط بستاني |
|
تجود بثمرها كل عام وله ذوقي |
|
واحسب الصداقة قصر ماثوق الأركاني |
|
وسيع ظلاله يدهله كل مخلوقي |
|
واحسب السحاب اللي سقا كل الأوطاني |
|
يجيب الحيا ما بين رعّاد وبروقي |
|
تشرهت لين إن الشره منك عناني |
|
احسب العلاقة بين قلب ومعلوقي |
|
تذكر وانا اذكر ثم ابعطيك برهاني |
|
وبعض المواقف يا رجل تدمي الموقي |
|
يبين الردى فيها بزودٍ ونقصاني |
|
لما ثوبنا الضافي تبين به شقوقي |
|
الاكيف ثمنت المعرفة بالأثماني |
|
وترخص ثمنها تقل جاهل ومطفوقي |
|
أجاحد عن القاصي وأجاحد عن الداني |
|
وشرب الشفاشف ما يبلل لي عروقي |
|
تبيّن مقامي عند ربع وخلاني |
|
ألا كيف عدي عندهم صار مطروقي |
|
عرفت الجنيه وبان وزنه بميزاني |
|
واعرف الريال وكل سابق ومسبوقي |
|
ولانيب ادور للزبيدي بقيعاني |
|
وانا خابرن القاع ما فيه رقروقي |
|
ولانيب خابر بالمشاريف ميداني |
|
ولكن وفاء واخلاص والحي مرزوقي |
|
ابكشف حساب بين داين ودياني |
|
وابخلّص حقوقك وانا اخلص حقوقي |
|
وانوخ ركابي عند ذربين الايماني |
|
واصادق صديق صادق العهد مصدوقي |
|
يقولون غرس العام ما يبهج الجاني |
|
وانا أقول لله العجب جاد برفوقي |
|
اقوله وانا مانيب مرجف وفتاني |
|
ولكن عبارة حق من قلب محروقي |