يا رافع الصوت
يا رافع الصوت خلف الصوت
بالنا صفة وسط اباناتي
ما ينفع الصوت عقب الفوت
ولا نفع كبر شر هاتي
بالغبة الحظ أكله الحوت
أقولها وأكتب اوصاتي
والحظ يمرض بسهم الموت
لكن يقولون ما ماتي
في ديرة به ثلاث بيوت
وأقليبين ومنحاتي
حدر الجبل كلهن اسكوت
ما تسمع إلا التنهاتي
وابان الأسمر بها مسبوت
وادي الرما دون حذفاتي
عند أهلها كنها بيروت
اللي بها وصف جناتي
ما حدّن الا مدور قوت
لجل الولد والبنياتي
عقب الشوازن نكيل جفوت
ونبدل الحر بحداتي
اللي نبي حبلها المسموت
عوّد مزوّد بعقداتي
حيث ان فيها سحر هاروت
يأخذ بها القلب سجاتي
شفق على شمة النبوت
اللي من الوسم نبّاتي
قالوا تسبب ترا للكوت
جيب وسيع ومخباتي
قلت اختلط زيتها بزيوت
ويهربن كل صوفاتي
ماهيب زبعه ولبس بشوت
من يضمن كميت لمراتي
راع السرا يضمن الكيوت
الى ضمن باقي الزاتي
يوم إعترض درعنا المصموت
تكسرن الدريلاتي
يالله في دعوة وقنوت
تغفر ذنوبي وزلاتي
وتسهل امري وانا المكبوت
يا قاضي كل حاجاتي
لك ارفع الصوت خلف الصوت
بالنا صفة وسط اباناتي